'രാജ്യത്ത് നിരവധി നല്ല നടന്മാരുണ്ട്, എന്നാൽ മോഹൻലാലിനേക്കാൾ മികച്ചതായി ആരുമില്ല'; ബോണി കപൂർ

രാജ്യത്ത് മോഹൻലാലിനേക്കാൾ മികച്ച നടനായി മറ്റാരുമില്ലെന്ന് ബോണി കപൂർ. ഒരുപാട് നടന്മാരുണ്ടെങ്കിലും മോഹൻലാൽ അതിനേക്കാൾ മുകളിൽ ആണെന്നും അദ്ദേഹം പറഞ്ഞു. തെലുങ്കിലെയും തമിഴിലെയും മികച്ച നടന്മാരെക്കുറിച്ചും ബോണി പറയുക ഉണ്ടായി. ഇപ്പോൾ ഒരു പൊതു പരിപാടിയിൽ ബോണി പറഞ്ഞ ഈ വാക്കുകളാണ് സോഷ്യൽ മീഡിയയിൽ തരംഗമാകുന്നത്.

'തെലുങ്ക് സിനിമ ഒരു ഗ്ലാമർ വശം കാണിച്ചു, തമിഴിൽ നിന്നും ഭാരതി രാജ, ഭാഗ്യരാജ്, ശ്രീധർ അങ്ങനെ ഒരുപാട് നടൻമാർ ഉണ്ടായി. നമ്മുടെ രാജ്യത്തെ ഏറ്റവും മികച്ച നടൻ ഉണ്ടായിരിക്കുന്നത് മലയാള സിനിമയിൽ നിന്നാണ്, അത് മോഹൻലാൽ ആണ്. രാജ്യത്ത് നിരവധി നല്ല നടന്മാരുണ്ട്, എന്നാൽ മോഹൻലാലിനേക്കാൾ മികച്ചതായി ആരുമില്ല', ബോണി കപൂർ പറഞ്ഞു.

അതേസമയം, മോഹൻലാൽ അടുത്തതായി അഭിനയിക്കുന്ന ചിത്രം ഓപ്പറേഷൻ ഗംഗ ഷൂട്ടിംഗ് പുരോഗമിക്കുകയാണ്. ജോർജിയയിലാണ് ഓപ്പറേഷൻ ഗംഗ എന്ന ചിത്രത്തിന്റെ ഷൂട്ട് നടക്കുന്നത്. വിഷ്ണു മോഹൻ സംവിധാനം ചെയ്യുന്ന ചിത്രത്തിൽ മോഹൻലാലിനും അർജുൻ രാംപിലിനുമൊപ്പം ഭാഗ്യശ്രീ ബോർസെ, ആദിൽ ഹുസൈൻ, പാർത്ഥിപൻ തുടങ്ങി വലിയ താരനിരയാണ് ചിത്രത്തിൽ അണിനിരക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമിക്കുന്ന ചിത്രം മോഹൻലാലിന്റെ 367ാമത് സിനിമയാണ്.

ഉക്രെയ്ൻ- റഷ്യ യുദ്ധത്തിന്റെ പശ്ചാത്തലത്തിൽ ഇന്ത്യ നടത്തിയ ചരിത്രപ്രധാനമായ രക്ഷാദൗത്യമാണ് 'ഓപ്പറേഷൻ ഗംഗ'. ഈ പശ്ചാത്തലത്തെ ആസ്പദമാക്കി ഒരുങ്ങുന്ന ചിത്രത്തിനായി, പോളണ്ട്, ജോർജിയ, കസഖ്സ്ഥാൻ, ഡൽഹി, ഡെഹ്‌റാഡൂൺ, കൊച്ചി എന്നിവിടങ്ങളിലായി 180 ദിവസത്തെ ചിത്രീകരണമാണ് പ്ലാൻ ചെയ്തിരിക്കുന്നത്. കഴിഞ്ഞ ദിവസം ചിത്രത്തിന്റെ ടൈറ്റിൽ പോസ്റ്റർ പുറത്തുവന്നിരുന്നു.

Content Highlights: Boney Kapoor says Mohanlal is the best actor in the country